________________________________________
العنوان: الصبوه الكبري
إرسال بواسطة: منتصر مختار في أكتوبر
قصيدة
الصبوة الكبري
1
لو تستاهلي غير ما اسيبك
كنت فتحت الدنيا مدارس شان تتعلمي معني الريدة
وكنت اعيش ندمان علي شانك
كل الزمن الباقي اردد سيرتك اعيده
الا الدنيا الفانيه خرابه
ولدت زيك وماك وحيدة
وما بتستاهلي اسي عشانك
اكتب عمري الباقي قصيدة
حزينه تجسد حزن ايامي
طويله تحدد سهد الدنيا عريضه
ولو تستاهلي غير مااسيبك
كنت فتحت الدنيا مدارس
شان تتعلمي معني الريده
2
حبك كان الغيم الطاهر قبل عيونك
وكان العيد في عيون اطفال
فيهم طعمك وفيهم لونك
وكان الموج في ذاتي بيرقص
قبل شروق الحب في عيونك
كانت اجمل كلمه حروفك
واجمل فن في الدنيا فنونك
احلي قصيده اقوله وصالك
واجمل حكمه اقوله خصالك
واحلي نغم غنيتو نشيدك
واسحر منظر : بسمة وجهك ومدة ايدك
الا بمد الايد تتيبس قبال تصلك ويحرق ريدك
وابحث عنك وشبه الماضي الجاني بشارة
ووصفك عيده
والقي الحاجز بيني وبينك ماساه عريضه
ولو تستاهلي غير ما اسيبك
كنت فتحت الدنيا مدارس شان تتعلمي معني الريده
3
قدرك ؟؟؟!!
لا لا ما كان قدرك
ربنا عادل
انت الخنجر وطعم الدم النازف نازل
وانت القاتل
وانت الدمع الشايل هاطل
وبي ايديك اخترت طريقك
بي ايديك اشعلت حريقك
كل الوجع العنك منك
كل الريد الطالع منك
راجع ليك
لي قلب اناني
وما كان ممكن اقدر اسايرك
اكتر مما سرت متاهتك
بين احلامي وعنت افكارك
وحر الدمعة التايهة شريدة
ولو تستاهلي غير ما اسيبك
كنت فتحت الدنيا مدارس
شان تتعلمي معني الريدة
4
كنت بقول والعالم اضيق من افكار النجا والمهرب
باكر يمكن قلبك يسمح ينزل من جنحات اوهامو
يحن لي طهر الريده ويطرب
وحتي الوجع السري في دمي وفيني اتلهب
كنت بشوفو ضريبة وصلك
واحلم من تحنانك اشرب
ويشفي ويبري جروحي وفاك
واصبر احلم
انو العالم يمكن يصبح
صورة حلمي وكت اتخيل
اني قطعت بحار الدنيا وجيتك بلسم
يشفي احساسك بي دنياك الصاخبه حزينه
ومافي وحات الجرح النازف
حزنا زيي عزاهو قصيده
ولو تستاهلي غير ما اسيبك
كنت فتحت الدنيا مدارس
شان تتعلمي معني الريدة
5
فاكره العالم احلام صبوه عن الشفناهو
وايه حاتجيبي جديد وحياتك
يصبح مفرد في معناهو
تكسري حاجز انوثتك - مثلا - تصبحي زي ابطال السنما
تحددي لي دربك مجراهو
وللا حتصبحي خواجية fraind and husband and loval
وكل مقالا جو حدودو يفيض معناهو
ولا لا وابدا يقدر يمكن يتعداهو
فاكره حاتخلقي دنيا جديده
وايه حايكون القول وحياتك
لو في يوم سكتت غريده
وطارت للغربان تتعلم
جوه كوارث الدنيا نشيده
لو تستاهلي غير ما اسيبك
كنت فتحت الدنيا مدارس
شان تتعلمي معني الريدة
6
وريدتك اصلا كانت غلطه
وابدا ابدا ما بتترادي
وكل قصايدي الصاغت حسنك
كانت وهما من اعماقي وكان في وادي وانت ف وادي
وبيني وبينك مليون حاجز
واف صحاري والف بوادي
وبيني وبينك كانت غلطة كيف خيرتك
تثبتي روحك جوه مدادي
بلون الفرحه ..
بلون النار ..
إيات تختاري
وغلطي الاكبر كنت بطيعك
وفارد ليك بي صمتي شراعك
وين مادايره وكيف تختاري
وابد ما برضاك تتاسي
وابدا مابرضاك تنهاري
الا زمانك عدي وروح
ومهد في اوجاعو نهاري
وديييييييييييك اسوار دنياك بعيده
ولو تستاهلي غير ما اسيبك
كنت فتحت الدنيا مدارس
شان تتعلمي معني الريدة
7
وسبتك او سبتيني وحاتك ما عاد يفرق
طول ما الغربه بتفصل بينك وبيني وكت ما الاقي عيونك
تب مابفرق
وطول ما حزنك بصبح ناري وحزن قصايدي بيعبر حسك
تب مابفرق
وطول ما الوهم السايق دربك باقي دليلك
شمس احلامك ما حا تشرق
طلع الفجر عليك مرثيه
عاد الطير انغامو شجيه
بكي في ساحتك لحن الغربه وسافر عنك
وعن دنياك الفاكره وحيده
ولو تستاهلي غير ما اسيبك
كنت فتحت الدنيا مدارس
شان تتعلمي معني الريدة
8
ما حاسًيبك ؟؟؟؟؟
وكيف ياستي احس وريني ؟؟
كيف ياست الناس العالمه
كيف ياست الرقه الحالمه احس
وريني ؟؟
يمكن منك يوم اتعلم اغير حسي في باقي سنيني
اكونلك شاكر
حسك ابد
ما حاتشابه يوم الوانو مشاعر شاعر
وحسك ابدا ما حايشابه في احساسو اقلي قصيده
دنيا عنيده
مدت فيني احزانه عريضه
ولو تستاهلي غير ما اسيبك
كنت فتحت الدنيا مدارس
شان تتعلمي معني الريدة
9
رجعي ؟؟؟؟
آي رجعي
واحيا واموت شان الرجعيه
اضحك .. ابكي .. اغني .. ادوبي ..
اهاجر .. ارحل عن عينيك وحضارة حبك للرجعية
للاوجاع المالكة قصيايدي قبل ما اعرفك
للابديه
وامسكي في غربانك طيري
كلتي .. عصٍبي .. اوعك تقعي
ومهما طرت .. مصيرك تصبحي يوم مكسوره وتب ماتبري
وكيف حا تصالحي احساس الصفوه وكان ضيعت شذاهو العطري
وكيف احساسك بصبح رليع بالحنيه
وانت خرجت الليله علينا مسافره وراحله عن الرجعيه ف رحله سعيده
ولو تستاهلي غير ما اسيبك
كنت فتحت الدنيا مدارس
شان تتعلمي معني الريدة
10
كان النور يرتاح في حبك
كلما تشرق شمس جديده
وحبك كان النخلة العاليه
ووصلك عطرا هز جريده
ومال شبال للامل الراقص
حبك كان الموج الحالم
حول جزاير الامل الباسم
الا الطير الهاجر منك
حالو يحنن جبل القسوه
وصفك يبكي
وقال علي انك بائسه .. كئيبه
وموية البحر الضامه جزايرك كان من دمعك
الا النبع الطالع منك ولسع سايل
غرق فيك زهر العفويه وضيع دنك
وكانت ارادتك
يوم سايرت الزمن الارعن وفيك اتوغل
ياماساة العمر الفضل
يا نار ذكري الحب الاخضر
كيف بيموت الزهر الناير
وليه عن غصنك يرحل طاير
ويلقي العالم
اضيق واصغر من احزانو الفيك عريضه
لو تستاهلي غير ما اسيبك
كنت فتحت الدنيا مدارس
شان تتعلمي معني الريدة
11
عاز تتخلصي من احزانك ؟؟
كانت اجمل ما في عيونك
وكان عنوان الانسانيه
وكان اكسيرك في الازليه
وآه لو عارفه الحزن وحاتك
كيفن بنعش زهر الالفه
وكيف المطر الصابي بخدر
بعد رحيلو الارض البائسه وتلبس توب افراحه بهيه
حزنك كان الحس الدافي يقالد الدنيا
ومسري احلامنا لدنيا رضيه
وحزنك كان الوعد الحالم
لي افراحا جايه سخيه
الانسان من غير احزانو جماد يتحرك
في طرقات الدنيا مجرد من ميزات الانسانية
وارحلي
فوتي وسيبي احزانك
الا وحاتك لو كان ترجعي تلقي الحزن بينكر انك
كنت الدره الفيهو فريده
لو تستاهلي غير ما اسيبك
كنت فتحت الدنيا مدارس
شان تتعلمي معني الريدة
12
وزاد الحب يا حلوه صراحه
صراحه تجمل للايام الجايه الساحه
وطول ما الشك بيناتنا بعتم شمس الالفه ويمحو صباحه
لا بيرتاح البال وحياتك
بنحس في يوم الراحة
يا الفي قربك كنت الخنجر
يا الفي بعدك
نار الشوق الضارمه الساحه
اعيش في بعدك بي اوجاعي
اجابه الدنيا
واصلي محارب
فاقد جيشو وفاقد سيفو وفاقد درعو
حصانو الموهن رحل الاخرة يكوس الراحه
وكانت منيه وروحو وحيده
و لو تستاهلي غير ما اسيبك
كنت فتحت الدنيا مدارس
شان تتعلمي معني الريدة
13
ساذج دايما طفل بيحلم بي نجمات السما في ليلو
فاكر العالم يمكن يصبح جنة جميله
وكل افاقو مداك تحكيلو عن الايام والسكه الجايه
دنيا جميله حملتها واهم كانت اسمك
وجامح خاطري التاه في رسمك
عاد مكسور ضلاهو سبيلو
حكي للنجمة القالها حبك ساعة النشوة
وعاد محزون ميؤس في ليلو
******
لو كان كل جميل في الخاطر بصبح كذبه
عبثا نرجي الفجر يشعشع
وعبثا نصبر وتاني نجمع
حبل الصبر الداب متقطع
ولو كان رحم العالم وعدك
عبثا بحلم بالانسانه
وعبثا اكتب اي قصيدة
لو تستاهلي غير ما اسيبك
كنت فتحت الدنيا مدارس
شان تتعلمي معني الريدة
14
ارحل عن وديانك صامت
وزي ما الشعر الصارخ وهاتف وصلك ابكم
ارحل صامت
كذبه كبيره حملتها حبك
عالم باهت
انا عمقت الوانو مشاعر
وانا جملت الدنيا ازاهر
وانا صدقت في يوم علي انك
زي امالي الفيك بتبقي وعشت مغامر
عاشقا يحلم انو العالم يصبح ازاهر
ودايما يبحث في اهوال الكون عن مامن
ويلقي العالم اضيق واصغر
من احزانو الواسعه عريضه
و لو تستاهلي غير ما اسيبك
كنت فتحت الدنيا مدارس شان تتعلمي معني الريدة
الا الدنيا الفانيه خرابه
ولدت زيك وماك وحيدة
منتصر مختار عبد الرحمن
27/12/1997